Formaður Félags blikksmiðjueigenda, Stefán Lúðvíksson, ásamt viðskiptastjóra félagsins hjá Samtökum iðnaðarins, Þorgils Helgasyni, sóttu norrænan fund Nordisk blikkenslagermesterforbund í Danmörku 12. september síðastliðinn. 

Umræðuefni fundarins voru umhverfi og helstu áskoranir greinarinnar þar sem mannauðsmál og menntun bar helst á góma. Fundurinn var haldinn á Clarion hóteli á Kaupmannahöfn. Niclas Olsson tók við sem nýr forseti samtakanna af Jan Henrik Nygård. 

Stjórn Félags blikksmiðjueigenda mun vinna að því í sameiningu að auka veg og vanda iðnaðarins með markvissri markaðssetningu. 

Stefán Lúðvíksson, formaður Félags blikksmiðjueigenda, er annar frá hægri og Þorgils Helgason, viðskiptastjóri á mannvirkjasviði SI, er lengst til hægri.

Niclas Olsson, t.h., tók við sem nýr forseti samtakanna af Jan Henrik Nygård.

Stjórn Félags blikksmiðjueigenda endurkjörin

Stjórn Félags blikksmiðjueigenda var endurkjörin á aðalfundi félagsins sem var haldinn 30. apríl síðastliðinn. Í stjórn félagsins eru Stefán Þ. Lúðvíksson, formaður, Hallgrímur Atlason, Sigurrós Erlendsdóttir, Jónas Freyr Sigurbjörnsson, Gauti Fannar Gestsson, Sveinn Finnur Helgason, varamaður, og Jóhann Helgason, varamaður.

Fundurinn var vel sóttur af félagsmönnum og daginn eftir hélt tæplega 50 manna hópur í árshátíðarferð félagsins til Zagreb. Myndirnar eru frá árshátíðarkvöldi félagsins sem haldið var á 17. hæð með útsýni yfir borgina. 

Blikksmiðja Guðmundar fagnar 50 ára afmæli

Nýverið fagnaði aðildarfyrirtæki Félags blikksmiðjueigenda, Blikksmiðja Guðmundar, 50 ára starfsafmæli og bauð af því tilefni til veglegrar veislu í húsnæði sínu á Akranesi. 

Starfsfólk, birgjar, viðskiptavinir og kollegar fylltu húsið og var gleðin allsráðandi meðal gesta. Eigendur Blikksmiðju Guðmundar vilja færa öllum gestum innilegar þakkir fyrir komuna.

Sævar Jónsson, eigandi Blikksmiðju Guðmundar, bauð gesti velkomna. 

Myndband sem hvetur ungt fólk til náms í blikksmíði

Félag blikksmiðjueigenda er að birta á samfélagsmiðlum nýtt myndband sem segir frá fjölbreyttu starfi blikksmiða. Tilgangur myndbandsins er að hvetja ungt fólk til að skoða möguleikana með námi í blikksmíði.

Í myndbandinu segir að á Íslandi vanti fleiri blikksmiði. Á vefnum fbe.is er hægt að lesa um hvað blikksmíði er og hverjir meginstarfsþættir blikksmiða eru. Einnig er farið yfir helstu hæfnis- og þekkingarkröfur sem eru gerðar til sveinsprófs í greininni. 

Hér er hægt að nálgast myndbandið:

Heimsóknir í Stjörnublikk og Blikksmiðjuna Vík

Fulltrúi SI, Þorgils Helgason, viðskiptastjóri á mannvirkjasviði SI, heimsótti Stjörnublikk sem er aðili að Félagi blikksmiðjueiganda . Stofnandinn og framkvæmdastjórinn Finnbogi Geirsson tók á móti Þorgils og kynnti starfsemina. Stjörnublikk er stærsta blikksmiðja landsins með 100 starfsmenn. Almennt starfa um 70 manns við ýmis konar verkefni út í bæ og um 30 manns á staðnum. Stjörnublikk sérhæfir sig í loftræsikerfum, klæðningu hitaveituröra og uppsetningu á læstum klæðningum. Fyrirtækið tekur að sér alla almenna blikksmíðavinnu. 

Þorgils heimsótti einnig Blikksmiðjuna Vík sem einnig er aðili að Félagi blikksmiðjueigenda. Þar tóku á móti honum eigendurnir og stofnendurnir Eyjólfur Ingimundarson og Jóhann Helgason. Jóhann kynnti starfsemina og kom meðal annars fram að helstu verkefni blikksmiðjunnar eru mest í utanhússklæðningum og loftræsikerfum en hitaveituskápar hafa einnig verið  vaxtarbroddur hjá þeim undanfarið. Þess má geta að Blikksmiðjan VÍk verður 40 ára á árinu.

Þorgils Helgason og Finnbogi Geirsson í Stjörnublikk.

Þorgils Helgason og Jóhann Helgason í Blikksmiðjunni Vík.

Heimsókn í Ísloft

Fulltrúi SI, Þorgils Helgason, viðskiptastjóri á mannvirkjasviði SI, heimsótti Ísloft  sem er meðal aðildarfyrirtækja SI. Ísloft sem er blikk- og stálsmiðja er aðili að  Félagi blikksmiðjueigenda og tók Sigurrós Erlendsdóttir, stjórnarmaður í félaginu, á móti Þorgils. Gunnar Valdimarsson, framleiðslustjóri, og Jón Arnar Haraldsson, verkstjóri, sýndu starfsemina sem er á Bíldshöfða 12-14 en hjá fyrirtækinu starfa 69 manns. 

Fyrirtækið sérhæfir sig í framleiðslu og uppsetningu loftræsikerfa ásamt því að taka að sér ýmis konar fjölbreytt verkefni um allt land. 

Jón Arnar Haraldsson og Þorgils Helgason.